Halaman

Kamis, 26 Mei 2011

Foto Bukittinggi tempo Dulu

Saketek Dari Urang Rantau :

Assalamualaikum Wr. Wb.

Sapihak dek kami ko nan datang nan sararak langkah dari rumah, sarayun lenggang dek nan bolong, manuju ranah kampuang, nan ko kampuang nan endak katinggian dipaga bukik bakuliliang, disalo gunung tungku tigo, tigo nan cukuik sajarangan. Batang karambia linggayuran, rumpuiknyo gatia-gatia liaran, sawah bapiriang kanan data, ladang bapetak dinan lereng, cando dusun batumpak-tumpak. Maijau rono parak mudo, jaguang maupiah dek tangkai bak timak bungo lado, buah taruang ayun-ayunan salo manyalo kacang panjang antimun mengarang buah.
Mako diiliakanlah jalan nan panjang, jalan rayo titian batu labuah gadang cindai tajelo. Labuah cindai tajelo kasiah manipih bak dipipih, pasianyo aluih bak di pimpiang batu bulek susun basusun, paga iduik baliak ditimba, pudiang ameh sabalah lua, pudiang itam sabalah dalam, diluang babatang-batang mambelok lalu ka halaman, mambelok lalu ka ilaman ndak panjang amek malayah bungo saliguri marumbai bungo tali-tali bungo tinjau sapanjang kawan, tabik paromo randah-randah. mako babunyilah bunyi-bunyian maririah si balang talai bakukuak di nan pancuci marentak balam bungo tawa.
Talengong ka dalam parak, cubadak lalaian daruak, kamuniang sandaran alu limau manih pautan kubu, tabek baguntan ba kiambang, aia nyo janiah ikannyo jinak bulari babondong-bondog bada sapek basikua-sikua bada puyu barayangek gariang malinteh-linteh, salorong jo badan diri kami nan basak buruang bundo tabang sakawan di udaro babega di rimbo nan satumpak maraok di kayu rimbun, daun tatagun maliek rantiang lai ka suko diingok, kami bukan kamari sajo sikajuik tumbuah jo ilalang, kamari bukan kamari sajo, gadang mukasuik nan bajalang. badia japun dibangka ulu, penembak kapa dimuaro, bari ampun ambo dek pangulu sambuiklah salam dek juaro.



KLV001074890


Jam Gadang Jaman Bulando

Salam Sujuik Kami dari Rantau Ka Datuak jo Mamak Di Kampuang

-----------------------------------------------------------------------------

1 komentar:

  1. Alhamdulillah lai ndak paralu ambo pakai translate untuk mambaco postingan sanak nan iko do.. hhahaha... kato katonyo padiah sanak, duo jempol untuak sanak!! nice.. :)

    BalasHapus

Nan Mambanggun yo Saudaraku